आज अचानक
आज अचानक असे लाभला या गीताला सूर
आज अचानक कसा पालटे नियतीचाही नूर
गमे अचानक आज संपली हृदयातिल हुरहूर
किती दिसांनी शांत जाहले मनातले काहूर
गूज मनीचे तिज सांगाया आजवरी आतूर
प्रतिसादाच्या सुप्त भीतिने सदैव चिंतातूर
हृदयी वन्ही तरी न पसरे कधि शब्दांचा धूर
उतावीळ कंठाला ताकिद संयम, धीर, सबूर
आज अचानक तोडुन बंधन झाला कंठ फितूर
सुप्त गूज-बीजाला अवचित फुटले शब्दांकूर
सुन्न जाहलो, पुनश्च काहुर, सूर न हो बेसूर
मन वांछित प्रतिसादे काहुर ठरले क्षणभंगूर
“हो” म्हणतांना प्रिया जाहली सलज्जभावे चूर
स्वीकाराचे शब्द, शब्द ना रुणझुणला संतूर
क्षणी त्याच मज स्वर्ग भासला दोन अंगुळे दूर
हर्ष उसळला असा जणू की नाचे धुंद मयूर
प्रीतीगीता आज लाभले ताल नाद लय सूर
उभय अंतरी प्रीतचांदणे उजळे शुभ्र टिपूर
..... उल्हास भिडे (८-१०-२०१०)
No comments:
Post a Comment